المتمرد | السلسلة الأولي الجزء الواحد والثلاثون

المتمرد | السلسلة الأولي الجزء الواحد والثلاثون

جدى:حلو جدا سيبلى أنا موضوع ساره هعرف أنا و عيالها و حتى جدتك نظبط الموضوع من ناحيتها و انت ركز مع شروق دى أنا عايز الموضوع يخلص فى السريع.

المتمرد | السلسلة الأولي الجزء الواحد والثلاثون

أنا:تمام جدا بس خلى بالك الموضوع هيبقى مكلف شويه.

جدى: هتاخد عموله فيه ولا اى ؟

أنا:عمولة إيه بس 😅 ، جدى أنا هغرى شروق بالفلوس خصوصا أن على حد معلوماتى هما عيله على قد حالها شويه و لو هى اتطلقت من عمى كده هي هتفقد مصدر دخل ما عمى اللى بيصرف ده غير إنها كانت بتاخد فلوس من الشركه أينعم قليله مش كبيره زى الموظفين بس اهى بتسد انت كمان هتشيلها من الشركه ف بكده انت عورتها جامد و هنحتاج نراضيها.

جدى: هتعوز كام يعنى ؟

أنا: هكلمها و أشوف الدنيا إيه معاها بس متقلقش الموضوع ده هيخلص قوام قوام حتى ممكن اكلمها النهارده اقابلها فى كافيه مثلاً ولا حاجه أحاول أقنعها بالموضوع أو ممكن ازور بيت عمى هناك و افاتحها فى الموضوع.

جدى: تمام أوى و أنا هشوف عمك اجيبه الفيلا عندى أحاول أفتح معاه الموضوع و أهديه علشان دماغه متزجنش و حتى نسهل الموضوع على شروق دى شويه على … الموضوع يسلك.

أنا: متقلقش يا جدى أعتبر الموضوع خلص ، ها إيه تانى على رأى محى اسماعيل 😂.

جدى: مشكلة أبوك و أمك لازم ليها حل لإن دى مش بس واخده العيله ده حتى الشراكه بينا و بين عيلتها موجوده فى النص أخوها عاصم كان بيتكلم و قلبه جامد علشان عارف وضع الشركه اللى هيأذينا اكتر ما هيأذيهم.

أنا: أزاى يعنى يا جدى ؟

جدى: شوف يا على ، زمان عمك محمد لما لقى فيه بينا و بين عيلة الرفاعي حرب سوق و كانت شرسه أوى و هما اقوى مننا شويه حب يناسبهم و بكده يقدر يخفف من قوة حرب السوق اللى شغاله بل و كمان ده اتحاد أكبر قوتين فى السوق وقتها ساعتها أنا رفضت بس جدتك وافقت لإن أبوك كان فى الوقت ده على غير العاده منطوى على نفسه و حزين أبوك ده كان فرفوش البيت ميغركش وش البومه اللى مصدره ليك كل ما يشوفك ، المهم جدتك سمعت الإقتراح وافقت بل و ضغطت عليا علشان أوافق على الفكره كمان و بعد كده من الوقت اضطريت أوافق جدتك مكانتش سايبانى فى حالى زن الحريم أمر من السحر يابنى.

أنا: طيب و انت كنت رافض فى الأول ليه يا جدى ؟

جدى: لسببين اولهم أن خفت أبوك يظلم البنت معاه اللى هى أمك ابوك فى الوقت ده كان متغير جامد حتى انا توقعت أن ده ممكن يكون بسبب بنت اتعرف عليها بس مقدرتش اتأكد وقتها و تانى هام أن هيتفهم إن أنا بتجنب أنى اكسب شركة الرفاعي فى إطار منافسه ف دخلت من حته تانيه هتشاف ضعيف يا على و أنا محبش أنى اتشاف كده أبدا لإن عمرى ما كنت كده.

أنا: أممممم فهمتك يا جدى بس كنت بتقول إن خالى عاصم بيتكلم و مش خايف على وضع شركتهم لإنها مش هتتضر بشكل قوى زينا.

جدى: هفهمك يا على أعتقد جه وقته تعرف الظروف اللى أبوك اتجوز أمك فيها ، شوف يا على الجواز بالذات مش بس متوقف على موافقة العريس و العروسه ده نسب يابنى و على رأى المثل اللى بيقول قبل ما تناسب حاسب ، لازم تبص تشوف انت هتناسب مين مش بتكلم على المستوى الاجتماعي بس لأ أنا بتكلم على العقليه اللى بناسبها هما ثقافتهم ايه كويسين ولا لأ رجاله ولا نص كُم علشان ده بيديك نبذه أوضح عن البيئه اللى اتربت فيها البنت او حتى البيئه اللى هتتعامل معاها لو حصل مشكله بين الراجل و مراته.

أنا: كل ده جميل يا جدى بس مش فاهم فين المشكله ؟

جدى: أنا يوم ما ناسبت كنت شايف قدامى محمد الرفاعي جد أمك هو كان كبير العيله وقتها ، جدك كان راجل محترم أوى يا على و كان ألف من يعمل له حساب كان شغال بالمثل اللى بيقول امشى عدل يحتار عدوك فيك و جدك كانت أعداؤه كتير يتمنوا يمسكوا عليه غلطه واحده لكن هو كان ابن بلد و جايبها من تحت و كانت أخلاقه عاليه أوى يحترمك وقت الخناق يمكن اكتر من وقت الصحوبيه و السلام عمره ما كان يقل من حد علشان كده كان الكل يعمله ألف حساب لإن حباييه كتير فى السوق قدر بذكاؤه يكسب ود الشركات الكبيره قبل الصغيره و بالرغم من كده عمرى ما حسيت أنه اتكبر على أبوك اللى كان وقتها لسه مشتغلش يعتبر كان عمك هو اللى ماسك الدنيا ف الراجل بالنسبه لينا كان أقرب للمثاليه لكن المشكله بقه كانت فى خالك عاصم.

خالك يا على أول واحد عارض الجوازه دى حتى أعلنها بشكل صريح أكتر من مره لكن جدك و جد أمك كان بيقدر يأدبه و أبوه نفسه مكنش يقدر يقول حاجه ، عارف إن ممكن تشوفنا بشكل مش كويس يا على لكن يابنى أنا أكتر من مره اتكلمت أن نلغى الموضوع ده لكن بيرجع عمك و جدتك و حتى جد أمك فى مره حس بالموضوع و قالى لو على أخوها ف الموضوع محلول خصوصاً أن أمك كانت رايده أبوك و حتى جدك أبو أمك نفسه مكنش عنده مشكله مع أبوك كان بيتعامل عادى مقدرش اقول انه كان مرحب أو كاره.

أنا: جدى أنجز شويه قربنا نوصل 😂.

جدى: صدق أنا غلطان أنى بوعيك يا كلب السرايا أنت 😂.

أنا: معلش يا جدى بس أنت تقريباً سرحت فى الكلام و أنا مستنى الأكشن بقالى مده 😅.

جدى: طب اسمع ، الجوازه مشيت و اتجوز أبوك و أمك و من البدايه حسيت ابوك مش مرتاح بس مع معافرة أمك معاه حسيت إنها هتنجح تخليه يلين ناحيتها و إحساسى ده كان أقوى لما جت أختك و كان طالع بيها السماء كان طاير من الفرحه حسيت أبوك رجع لقبل ما الموضوع يتفتح أصلا الشاب الفرفوش اللى تحب تتعامل معاه غير كده معاملته مع أمك اللى اتحسنت كتير بقيت أحس أنها علاقة جواز بجد و ده كان راضى عيلة أمك اللى كانت شايفه أبوك مقدرها حتى خالك عاصم مكنش يقدر يفتح بوقه مهو كان حجته أن أبوك فيه كلام أنه كان بيحب واحده قبل موضوع أمك لكن أبوك أنكر بس الإنكار مكنش قوى لكن كان كافى أن الموضوع يكمل و مادام أبوك بيعامل أمك كويس يبقى ده كان كله إشاعات لحد ما حصل اللى غير أبوك تانى وجودك انت.

أنا: يعنى هو فضل فرفوش لغاية ما جيت و جت على حظ قرمط و زرار الفرفشه قفل 😂 ده ايه النحس ده يا ولاد😅.

جدى: بص يابنى أبوك أنا قعدت معاه اكتر من مره أكلمه بخصوصك و مقدرتش أفهم سبب أنه مش قادر يتفاهم معاك لغاية لما عرفت بوجود مراة أبوك ، نور إسم مراة أبوك نور يا على و اللى فهمته أن أبوك كان بيحبها أيام الجامعه.

أنا: طيب و أمى ؟ لما هو بيحبها راح اتجوز امى ليه أصلا ؟ و انتوا ازاى تسمحوا بحاجه زى دى ؟

جدى: صدقنى يا على انا مكنش عندي أى معلومه بخصوص الموضوع ده و حتى لما حاولت معرفتش أطلع بمعلومه وقتها لكن اللى فهمته أن أمك نفسها كان عندها المعلومه دى قبل ما تتجوزه و هى اللى خلته ينكر قدام أخوها أنه يعرف نور دى فكرته نسيها علشان كده انصدمت لما عمك قال قدامها أنه متجوز.

أنا: و كنت عايزنى أكون موجود و انت بتحل المشكله دى ها!! بعدين برضه يعنى هووووف بعيداً عن أن أنا مش عايز امى تنطلق بس فلنفرض اتطلقت و خالى عاصم قرر أنه يفك الشراكه أزاى ده هيأثر علينا بشكل أكبر منهم مجاوبتنيش برضه ؟

جدى: خالك عاصم قدر مع جدك أبو أمك يعلموا شركه تانيه بعيده عن الشركه الخاصه بشراكتنا كانت فى نفس المجال و اللى قدرت أفهمه برضه انها بإسم مختلف عن الرفاعى علشان يبعدوا الأنظار عنهم و بمساعدة من عيلة السيوفى قدر خالك و جدك يكبروا الشركه دى و بقه ليها شأنها دلوقتى.

أنا:اعذرنى يا جدى بس و انت كنت فين من كل ده ؟ للدرجادى مكنتش فى الدنيا معملتش حساب لليوم ده إطلاقاً سيبك من أبويا و أمى معملتش حساب أن ممكن تنفصل عن عيلة الرفاعي لأى ظرف.

جدى:يابنى أنا من ساعة ما أنت تميت ال ١٧ سيبت الشركه لأبوك و عمك بقيت بروح كل فتره العمر عدى و جرى يا على أنت كبرت أهو و خلاص هتتخرج من الكليه و ملك كبرت و جايلها عريس محمود ابن عمك هيخطب العمر عدى و أنا حسيت إن عمك و أبوك قد المسؤولية لكن الاتنين خذلونى للأسف كنت أتمنى يطلعوا قد المسؤولية لكن الواحد مش بيتعلم بالساهل.

أنا: إيه المطلوب منى دلوقتى يا جدى تفتكر إن ممكن الاقى حل للموضوع الملعبك ده ، اعذرنى يا جدى بس أنت عيالك كل واحد بيفكر فى نفسه كل واحد فيهم أنانى عمى هو اللى شبكنا مع عيلة الرفاعي علشان يوفر على نفسه تعب أنه يشتغل و يجتهد و أبويا انانى و مقدرش صبر امى و حبها ليه بل و كمان بيعاملنى وحش حسب ما انا فهمت من كلامك علشان بيشوف النسخه الحزينه منه بعد ما ساب نور دى فيا و عمتى سرحانه مع نفسها مش بنشوفها غير فين و فين عيالك كل واحد فيهم فى عالم تانى يا جدى و الغرابه أن أنت و جدتى كنتوا بتحاولوا دائما تقربوهم من بعض امتى حصل الفرق الواضح و الانانيه دى معقوله محدش حس !! للأسف يا جدى الموضوع ده أخره توقفه على كده و تنقذ الشركة لا أمى هتنسى اللى عمله فيها ابويا ولا أبويا هيقدر يسيب نور دى هى اتقفلت زى الدومنه.

جدى:معاك حق يابنى فى اللى قولته أحنا فعلاً حرصنا الزايد أنهم يقربوا من بعض واضح أنه جه بنتيجه عكسيه بس ده مش وقت نقاش فى أمور من النوع ده دلوقتي إحنا عايزين حلول تنقذ سمعة العائلة و سمعة الشركة قبل ما تنهار أكتر ما هى منهارة.

أنا: جدى هو عقد الشراكة اللى بين عيلتنا و عيلتهم فيه نسخه منه معانا صح ؟

جدى: ده اكيد بس بتفكر في إيه ؟

أنا: جايز المحامى بتاعنا يكون كان حاطط شرط فى صالحنا ولا حاجه ينفعنا فى موقف زى ده كمان عايز أعرف حالات الفسخ اللى محطوطة لعقد الشراكة أو الحالات اللى حاططها فى حالة اللجوء لفض الشراكة جايز نطلع بحاجه تجبرهم يبعدوا بتفكيرهم عن موضوع فض الشركة ولو انى مش موافق على ده أصلا المركب اللي ليها ريسين تغرق و احنا هنا فيه ريسين هيبقوا مش طايقين بعض بسبب حركه غبيه من أبويا و أغبى من عمى اللى كان عارف و خبى و يوم ما طلعها طلعها فى الوقت الغلط ، المهم كده اتفقنا دلوقتى أنا عايز ابص على عقد الشراكه لو تقدر تجيب ليا نسخه ولو متصوره بالتليفون ابص فيها و أشوف جايز فيه حل قانونى بس مهم إن محدش يحس بالموضوع يا جدى ولا حتى من عيلتنا كمان بالنسبه لموضوع شروق و عمى ف على اتفاقنا أنا هحاول مع شروق و انت تحاول مع عمي ومراة عمي.

جدى : اتفقنا يا بني اتفقنا.

كملنا الطريق أنا و جدي ساكتين كل واحد سرحان فى الطريق غالبا جدى كان مركز فى الحال اللى وصلنا ليه للاسف أبويا جوازه بوظ الدنيا أكتر بكتير من عمى علشان كده جدى عايز يخلص منها قبل مشكلة عمى نفسها مسكين جدي تعبه وشقاه العمر ده كله ممكن يروح بسبب غباء عيلين مستهترين.

قضيت اليوم فى الشغل ما بين المحكمة و الرجوع للشركة علشان اكمل الشغل اللى يخص ندى بصراحه مش عارف لغاية دلوقتى أنا ليه قبلت أخذ شغلها رغم أن خدمتها زى ما خدمتني في موضوع الهاك بتاع نادر ف المفروض خالصين لكن لقيت نفسى مهتم اساعدها تانى لما احتاجت ده على كل الموضوع جه فى مصلحتى ، اومال مش سألتنى دلوقتى ازاى انا هقولك أزاى.

بعد حليت موضوعى أنا و محمود و شمس و حتى شروق راحت الاجتماع جدى سمح ليهم يرجعوا شغلهم وبالتالى العجز اللى كان فى القسم عندنا بدل ما كان ٣ بقى ١ واللى هى ندى و رجع استاذ وجيه وزع الشغل تانى و اتنقلت أنا مع محمود لإن مش هينفع شروق تبقى مع محمود و تقريباً دى توصية من جدى للأستاذ وجيه.

طبعاً يا عزيزي أنا مش هسيب فرصه زى دى و مش استغلها بالعكس أنا من ساعة ما أستاذ وجيه أعلنها بدأت اخطط ازاى استغل ده لصالحى.

عدى اليوم بالنسبه للشغل عادى و كان مع هدى لكن مخلصش بالنسبه ليا ، خلصت شغل مع هدى و كنا عند محكمة…… سابتنى هدى و اتكلت على بيتها بتقول عندها ضيوف على كلٍ مش موضوعنا.

أتصلت على شروق علشان أشوف معاها موضوع عمى محمد خلينى أخلص من ده موضوع و بينى و بينك عايزها تطلع كسبانه من الموضوع أكبر قدر ممكن لإنها وقفت معايا وقت احتياجى ليها.

على: سلام عليكم.

شروق: وعليكم السلام ، عامل ايه يا حاج عاش من سمع حسك.

على: أهو فى الدنيا هنروح فين أنتى عامله ايه ؟

شروق: نحمده على كل حال خير يا على ؟

على: مالك يا شروق بتتكلمى كده ليه ؟

شروق: يعنى مش عارف ليه يا على ؟

على: لأ مش عارف ليه ، بقولك إيه سيبك من الكلام ده عمى عندك ؟

شروق: لأ بس بتسأل ليه ؟

على: عايزك تقابلينى انتى و ولاء فى كافيه…… كمان نص ساعه الكافيه مش بعيد ف هتلحقى عايزك فى موضوع مهم يا شروق أوعى تتأخرى و متنسيش تجييى ولاء معاكى.

شروق: تمام نص ساعه بالظبط و هنكون هناك.

( بعد نص ساعه )

دخلت الكافيه و كان تبع حد معرفه يعنى بالنسبه ليا أمان محدش هيقدر يتجسس علينا حتى لو حابب و ده لإن أنا مش هقعد معاهم على ترابيزه عاديه أنا هقعد معاهم فى مكتب المدير نفسه.

دخلت لقيتهم قاعدين على الترابيزة فقعدت اتكلم معاهم علشان لما نقوم ندخل الموضوع يبان طبيعى.

أنا:هلا و… بالشباب كيف أخباركم شنو أحوالكم ؟

شروق: خير يا على عايزنا ليه ؟

أنا:بت أنتى هتلوى بوزك يبقى مش عايز اشوفك ده إيه ده ، بعدين مالك لاويه بوزك ليه أصلا ؟

شروق:منى حكتلى على موضوعك أنت و شمس يا على.

أنا:نعم!!! و هى أزاى تحكيلك حاجه زى دى أصلا ؟ بعدين برضه مش فاهم ليه لاويه بوزك ؟

شروق:مش عايزنى أكون متضايقه و أنا كل ده بساعد واحد

أنا: أوعى تقوليها أوعى هخسرك للأبد يا شروق فاهمه ف اعقلى كلامك قبل ما تقوليه و أظن احنا نعرف بعض بقالنا بتاع ٤ سنين وشويه و ده وقت كافى تعرفى انتى بتتعاملى مع مين.

ولاء: شروق مش قصدها يا على هى الفكره كلها أن اللى عملته امبارح يتفسر بالشكل ده بس أن انت يعنييي.