المتمرد | السلسلة الأولي الجزء الخامس والثلاثون

المتمرد | السلسلة الأولي الجزء الخامس والثلاثون

شمس بصت ناحية محمود نظرتها ليه مقدرتش احدد مغزاها بس من الواضح أنها اتفاجئت بكلام جدي.

المتمرد | السلسلة الأولي الجزء الخامس والثلاثون

شمس: أنا عن نفسي صفيت يا جدى زى ما قولت وقتها أنا يكفيني أنه عرف غلطته و جه اعتذرلى قدام العيله ده كان كافى بالنسبه ليا.

محمود:يعنى إيه الكلام ده بقه!!! بتبيعينى أنتى كمان زيهم!!

شمس:عايزنى اكذب يعنى ؟ بعدين على ده يعتبر أخويا الصغير و المفروض نحبه مش نقعد نتخانق و نعمل معاه مشاكل ملهاش داعى ولا أنت رأيك إيه يا جدى ؟

محمود:عليا أنا الشويتين دول يا شمس ده أنتى …

جدى: أظن أنت أخدت اللى أنت عايزه يا محمود صح ولا أنا غلطان قولت اسألوا شمس و أدينا جبنا شمس و سألناها وردت بعكس اللى انت قولته دلوقتى بقه أنا عايز أتكلم معاكم انتوا التلاته و كلامى هنا محدش ياخدوا أن أنا قاصده هو أنا بقول كلامى بشكل عام.

عارفين إيه اللى نزلنى مصر من الأول علشان أعيش فيها مش علشان بره وحش بالعكس بره مكنش حد هيقدر يكلمنى أو يكلم ولادى أو أحفادى لإن أنا نفسى كان معايا الجنسيه فبالتبعيه كنا هنبقى واخدين الجنسيه بتاعتهم لكن أنا حبيت الدفى اللى بيتحكيلى عن مصر و ناسها و تقديرهم للعلاقات الإنسانية مش بقول أن هناك مفيش بس هنا مجتمع بيخاف على بعضه مهما كان فيه من عيوب جواه نضيف و ده أهم ما يملك الإنسان يا ولاد اللى جواه قلبك خليه نضيف سامح لو عندك القدره على ده خاف على اللى حواليك عيلتك بالذات العيله رقم واحد يا ولاد و ده مش كلام بصوا على أى فرد ناجح غالباً هتلاقى البيئه اللى هو فيها مهيئه لده مفيش فيها غل أو حقد فيها الكل بيساند بعضه لإن الاتحاد قوه أتمنى أعيش يا ولاد لليوم اللى اشوفكم فيه بتكبروا فى حياتكم و تبقوا أشخاص مبسوطين فى حياتكم تقدروا تخرجوا لو حابين.

خرجنا احنا التلاته من المكتب بتاع جدى ساكتين غالباً كنا بنفكر فى كلام جدى أو على الأقل أنا بصراحه كلامه أثر فيا لكن فى النهايه عدى اليوم و خلص على كده.

" تانى يوم "

صحيت تانى يوم بابتسامة على وشى و أنا من الناس اللى بتتفائل ببداية اليوم ف كنت حاسس انه هيكون يوم جميل و قد كان فعلاً.

اليوم مر زى أي يوم عادى بالنسبه للشغل فمكنش فيه حاجه مميزه أصلا شغلى فى اليوم ده كان أغلبه فى المحكمة.

اللى كان مميز بقه فى اليوم هى مكالمة ولاء اللى طلبت تقابلنى كانت متوترة وهى بتكلمنى فى التليفون بصراحه متوقعتش أنها تكلمنى بعد ما خلصنا كلام يوم الكافيه معاها هي و شروق ، اتفقنا أنها هتبعتلى لوكيشن و أتجه للمكان على أساسه.

خلصت شغل ورجعت على الفيلا علشان أجهز و أروح اقابلها بلبس غير الفورمال اللى الواحد مضطر يبقى لابسه أغلب يومه ، وصلت الفيلا ودخلت الملحق و لسه بفتح النور لقيت منى فى وشى.

أنا:يا أهلا باللى مقاطعانى و مش راضيه تسمعنى.

منى:وهو أنا زعلانه منك و مقاطعاك ليه مش علشان دماغك اللى حاطط مكانها علبة كشرى حمضان دى.

أنا: لا وانتى الصادقه علشان دماغك الهبله اللى سوّلت ليكى أن ممكن اسيبهم ثابتين عليا البلوه اللى عايزين يلبسوهالى.

منى:حوش حوش الواد قدر يثبت العكس يا متخلف ده أنت خليتها رسمى بدل ما كان فيها شكوك.

أنا: عارفه الفرق بينى وبينك إيه يا منى ؟

منى: كتير و كلهم لصالحى بس خلينا نقول إن أنا أذكى منك.

أنا:غلط أنتى ذكيه أه بس مش أعلى منى و الدليل إنك مقدرتيش تصبرى وحكمتى على الموقف من بره من غير ما تشوفى هل الصوره خداعه ولا لأ.

منى:و إيه بقه اللى كان خداع فى الصوره يا فقيق ؟

أنا:لو ركزتى و جمعتى فى دماغك الأحداث من ساعة ما جيت عملت اللى عملته هتلاقي أن كفتى بدأت تعلى عن محمود.

منى:وهو ده بقه الانجاز اللى مفيش منه ٢ يا سى زفت إنك تدلدل راسك ليهم علشان يقبلوك أخص على الرجاله.

أنا:يا حماره اصبرى و متقاطعينيش دلوقتى لما أنا بدأت اجذب الأنظار حواليا مره تانيه محمود بدأ يحس إن البساط بيتسحب من تحت رجليه ، الطمع وحش أوى يا منى و حظ محمود ان البيئه اللى حواليه مليانه بالطماعين أولهم كريمه البنت اللى بيحبها هى طمعانه فى الفلوس اللى عنده ف لو أنا أخدت مكانه يبقى خسرها و أبوه و أمه اللى دائماً كانوا مفهمينه أنه لازم يبقى الأول فى كل حاجه و محدش سابقه لدرجة أنه بقه حاسس إنهم مش هيحبوه لو حد تفوق عليه ف أنا بمثل ليه عدو عايز ياخد منه كل ما يملك و ميغركيش تعامله مع اللى حواليه و أنه مفتح و بيعرف يتكلم أه دى مهاره عنده بس اكتسبها لأنه مجبر أنها تكون عنده دى هى الطريقه اللى شاف أنه هيقدر يكون بيها الأول.

منى: طب هما ظلموه بأنهم حطوه فى الخانه دى أنت بقه ذنبك إيه ؟

أنا: للاسف في الحالات اللى زى دى محدش له ذنب لا هو ولا أنا ، ناس كتير يا منى بتعتبر أعظم إنجازات الإنسان أنه يكون شخص سوى نفسياً عارف نفسه و قادر يتفاهم معاها بالشكل الصحيح و بالتالي ينعكس ده على التعامل مع الناس اللى حواليك لكن علشان عارف سؤالك الجاى هيبقى إيه ف اسمحيلي أقولك أنه لأ مش هسيب حقى لكن مش هنتقم برضه

منى:ده اللى هو أزاى يعنى ؟ مهو هتاخد حقك معناها الانتقام

أنا: يبقى مفهومنا لأخذ الحقوق مختلف مش علشان أخد حقى لازم أكون ابن كلب زباله يكفى أن أثبت لنفسى و للجميع أن قدرت أعلم على اللى قدامى من غير ما أنزل لمستواه اللى هو أزاى فى حالتى دى أن اخليه يحس نفس اللى حسيته بل و اخليه يدوق من الكاس اللى دوقته أنا هعرف العيله أنه فعلاً كان مع شمس يومها بس في نفس الوقت هكون رؤوف بحالته و أسيب ليه الملعب ياخد راحته و يثبت نفسه من الآخر عايز اهيئ ليه الظروف أنه يعرف نفسه أكتر و مع مراقبة جدى ليه هيكون ماشى على الطريق الصحيح.

منى: ثانيه واحده معلش بس أنت قولت هتسيبله الملعب أزاى بقه معلش ؟ تكونش ناوى ترجع تانى عند الحربايه اللى إسمها رانيا دى تانى ؟

أنا:ولا ده ولا ده ولا ده بصوت عبدالباسط 😂.

منى: أنت بتهزر!!! .

أنا: أومال اسيبك تهزرى لوحدك يعنى 😂.

منى بنرفزه: أنا ماشيه.

أنا:طب خدى خدى بس و هقولك تعالى 😄 ، أنا فعلاً هسيب الملاعب بس على المستوى المحلي بشكل تام ، من كام يوم قدمت فى شركه مختصه بالترجمه القانونيه و دى شركه اجنبيه مختصه بالتعامل مع الشركات الأوروبية و اللاتينيه مكنوش بيتعاملوا مع شركات عربيه و حابين يتوسعوا فى شغلهم و يضموا موظفين كويسين فى العربى قدمت و عملت مقابله معاهم من مده و اتقبلت.

منى: استنى استنى يعنى أنت هتسافر!!!.

أنا: أه فيها إيه هو أنا عيل خايفه عليا أتوه 😂.

منى بتأثر:يعنى هتسيبنا أنا و ماما ؟

أنا: أنا عارف إن أنتى مش حابه بعدى عنك بس غصب عني أنتى اكيد شايفه البيئه اللى موجوده في البيت كله بيدور على نفسه البيت ده محتاج إعادة هيكله من أول و جديد و أنا مش هقدر أعمل ده لأسباب كتيره.

منى: طيب ليه متمسكش أنت الشركه بتأييد من جدك بيتهيألى حالياً مفيش حد أصلح منك لده أصلا.

أنا:مقدرش أمسك الشركه و اتحكم فى أبويا و عمى و وعمتى بعيالهم بعدين أنا معنديش خبره كافيه بالإداره أصلا ف أخاف تغرق أكتر و غير كده مين هيتقبل القرار ده من جدى و حتى لو تقبلوه هيبقى من ورى قلبهم و أنا مش عايز أدخل في خناقه جديده خلينى خارج كسبان و لو ليا نصيب فيها أكيد همسكها بس المؤكد أن ده مش الوقت المناسب.

منى:يعنى ده قرارك و خلاص مفيش رجعه 🥺.

أنا: للاسف يا منى معدش ينفع بس مش عايزك تقلقي أنا هحاول أشوفكم كل فتره ده غير أن هكلكم فيديو كول من وقت للتانى لإن أنا نفسى مقدرش استغنى عنكم يا منى.

فتحت دراعاتى و اخدتها فى حضنى كانت لحظه عاطفيه أوى بينى و بينها بصراحه فى اللحظه اتأكدت إن فعلاً هى من أغلى الناس على قلبى أنا فعلاً بحبها بس زى أختى طبعاً علشان دماغك متروحش لبعيد 😂.

أنا: بقولك إيه أنا لو فضلت حاضنك كده مش عارف ممكن يحصل فيا إيه كمان نص ساعه ف نخلص الحضن ده بقه خلينى أشوف مشوارى اللى اخرتينى عليه ده 😅.

منى:مشوار إيه ده بقه ؟

أنا:هقابل حد معرفه.

منى: أيوه مين يعنى ؟

أنا بتمثيل:ببب بصراحه بصراحه رايح اقابل بنات.

منى: نعم و بتقولهالى فى وشى كده ده أنت نهارك مش فايت 🙂.

أنا:دول بنات محترمه يا مونمون.

منى:ولما هما محترمين عايزين منك إيه بقه إن شاء… .

أنا: إيه يا بت الكلام الماسخ اللى عتجوليه ده.

منى: ايوه ما بنات محترمه يبقى مبتكلمش ولاد لوحدهم أو حتى وسط ناس لازم فيه حد من عيلتها معاهم و أنت قولت بنات بس.