المتمرد | السلسلة الأولي الجزء العشرين

المتمرد | السلسلة الأولي الجزء العشرين

الشخص:أحبك وأنت خاضع عمومًا أنا هسامحك المرادي ولو انك هتصعب عليا الأمور بالشكل ده بس لأجل عيون مراتك اللى جيالى النهاردة وهى مفكره أنها بتستغفلك هسامحك الهبله هى التانيه مفكره نفسها ناصحه متعرفش إن أنا اللى متحكم فى اللعبه دى كلها صحيح بالمناسبة مراتك هتقولك النهارده هتبات عند صاحبتها مش محتاج أقولك هترد تقولها ايه طبعاً.

المتمرد | السلسلة الأولي الجزء العشرين

هز محمد سيد النويري دماغه بعلامة الموافقه ليربت على كتفه الشخص السيكوباتى المحب للتحكم وعلى وجهه ابتسامه مستفزة و خرج بره الملحق و اتحرك بره الفيلا كلها و ركب عربيته و اتحرك بيها و أثناء ما بيسوق أتصل بشخص على تليفونه و بمجرد ما دق اول جرس رد الطرف التاني اكنه كان مستنى المكالمة

السيكوباتى: أنت فين يا زفت الطين ؟

شخص ٢: موجود يا ريس كنت عارف إن المكالمه دى هتحصل يعنى هتحصل بس صدقنى اللى حصل كان غصب عني مقدرتش أتعامل خصوصاً إن سيد النويري طب على الشركه فجأة و معرفتش اتعامل.

السيكوباتى: عقابك هيكون شديد يا نادر بس بالرغم من ده هديلك فرصه تانيه عايزك تنفذ اللى هقوله ده بالحرف المناقصه معادها قرب ولازم ناخد المناقصه دى بأى تمن و علشان نصلح غلطتك انت و المتخلف التاني بص انت هتعمل ……. متجودش من عندك زى ما قولتلك بالظبط تعمل لإن لو حصل أى غلطه هتدفع تمنها غالى جدا انت فاهم ؟

نادر:ولا يكون عندك فكره يا ريس اعتبر الموضوع خلص.

قفل السيكوباتى فى وش الشخص نادر وهو بيتوعد عيلة النويرى و عمال يقول لنفسه ولسه يا سيد هتشوف كتير بحق اختى اللى اتكسر قلبها مش هسيب عيلتكم غير و أنا جايبها فوقانى تحتانى.

فى نفس الوقت كان على موجود فى كافيتريا…… و دى كافيتريا موجوده في منطقة….. بعد ربع ساعه دخلت ولاء و شروق المكان واتجهوا ناحية على.

شروق:أما امبارح كان حتى يوم يا بوص تحفه 😂 كمية الحماس و إتقان الأدوار مش طبيعيه ده احنا المفروض ناخد أوسكار على اللى عملناه ده 😂 وكله بفضلك.

على:ايييه يا بنتى فيه ايه خدى نفسك بعدين أرمى السلام الأول وبعد كده قولى اللى تحبيه مش تدخلى عليا دخلة المعلقين المكسيكيين كده 😅😂.

ولاء:دى كلت دماغى يا على طول الليل شغاله زن زن على دماغى مش مصدقه إن الموضوع عدى و جدك بقه عارف بالموضوع لأ ومش كده وبس ده كمان سابها تكمل فى الشركه وبصراحه أنا كمان مكنتش مقتنعه بالخطه بس بعد اللى شفته ف لأ أنا امشى وراك مغمضه 😂.

على: ولسه لما تنفذوا اللى جايين نتفق عليه النهارده هخليكم تتنغنغوا و اسمكم يكبر فى الشركه و سيرتكم تكون موجوده على كل لسان مش مصدقين انكم كسبتوا الشركه المناقصه جدى مش بعيد يرقيكى أو يديكى مكافأه يا ولاء و ابقى قسميها انتى و شروق لو حابين.

شروق: اوووف حمستني يا على اكتر ما انا متحمسه شوقتني اعرف ايه اللى هيحصل ، بس ايه ده استنى استنى أستنى.

على:ايه ده مش دى الاغنية بتاعة روبى فى إعلانات رمضان 😂.

شروق:اتريق اتريق حقك 🙂.

على: إيه ده زعلتى ولا ايه ؟

شروق:أه أبعد عنى مخاصماك.

ولاء: مخاصماك وابعد عنى انا مش طايقاك سيبنى مش عايزه ابقى معاك متورنيش وشك تانى😂.

شروق:ده الحفله عليا بقه شكلها 🙂

على:انتى اللى رميتى الكلمه تستحملى بقه 😂 ، بس خلاص خلاص خلينا نسمع نشوف عايزه تقول ايه ؟

شروق: لا خلاص مش عايزه منكم حاجه 🙂

على:لا بقولك ايه انا دماغى فيها اللب مكفيها اخلصى الواحد ما صدق أنه فك شويه متجيش تنكدى على اللى جابونى 😂

شروق:كنت عاوزه اعرف اشمعنا ولاء اللى تتسيط وأنا لأ.

على:مهو يا انتى غبيه يا بتستغبى ما هو لو أنا ضميتك معاها جوزك مش هيسيبك لإن كده شغله اللى قبض بسببه باظ إنما لما تكون اختك بس ساعتها الموضوع هيبقى عادى فى النهايه انتى ملكيش حكم على اختك خصوصاً أنها الكبيره.

شروق: صدق عندك حق أنا فعلا بستغبى😅.

على خلينى بقه اطلب لكم عصير بعدين نتكلم ونشوف هنعمل ايه.

نادى على على الجرسون الواقف فى المطعم وقاله

على:لو سمحت ممكن تشوف الانسه و المدام يشربوا ايه ؟ ولا تحبوا تأكلوا الأول ؟

شروق: لأ ارحمونى مش قادره احط اكل تانى فى بطنى ممكن اشرب عصير مانجو لو سمحت بس تكون بارده.

الشاب: وحضرتك ؟

ولاء:هاتلى عصير افوكادو لو سمحت وياريت برضه يكون بارد.

على: وأنا عايز أشرب عصير افوكادو بارد برضه.

الشاب: تمام يا فندم عن اذنكم.

على:عقبال ما تيجى المشاريب خلونى أعرف أحوالكم ايه اخبارك و اخبار البيت يا ولاء والدتك عامله ايه دلوقتي اخر مره كنتى بتقولى أنها تعبانه و انتى يا شروق أخبارك ايه مش ناويه تجيبى بيبى صغير يملى عليكى الشقه الفاضيه اللى مفيهاش غيرك دى ؟

ولاء:أنا تمام بخير أنا و الجماعه و ماما اتحسنت جامد عن اخر مره مش عارفه من غيرك كانت الدنيا مشيت ازاى؟ بس حقيقى انت فى زمن قياسي قدرت تلاقى لينا مستشفى تقبل تستقبلنا بعد ما كنا فى العادى بنلف على المستشفيات علشان نلاقى ليها سرير.

على: أمك أنا يعتبرها زى امى ده غير إنها من طرفكم و مينفعش يكون فيه حد من طرفكم محتاجنى فى حاجه ومساعدوش حقيقي انا بعتبركم اخواتى البنات زيكم زى ليلى أه فى الأول مكنتش طايق الزفته شروق دى و كنت عايز أولع فيها 😂.

شروق:ما خلاص يا نجم مش جيت و اعتذرت لك مش كل مره تفكرنى بقه 😅.

على:لازم تفتكرى و تعرفى أن دماغك دى كانت هتوديكى فى داهيه لو مشيتى ورى كريمه.

ولاء:ليه مالها كريمه هببت ايه تانى ؟ هى البت دى مصايبها مش بتخلص ؟

على:هى لسه معملتش بس هتعمل متقلقيش و هتعمل معاكم انتم.

شروق:نعم ؟ وتعمل معانا احنا ليه هو احنا جينا جنبها ؟

على: واضح انك بتنسى يا شروق يا حاجه انتى متجوزه محمد سيد النويري عارفه يعنى ايه ؟ يعنى ابو الواد اللى بترسم عليه وده هيديكى سلطه أعلى منها هى مش عاوزاها تروح منها لأ و الأدهى الموضوع بدأ يطلع الوش واحده واحده يعنى مكانتها رسمى هترجع لورى على الأقل عند الرجاله بس إياكى ثم إياكى الموضوع لو عرفتى أنه وصل لستى ريهام تقربى من الفيلا على الأقل لمده من وقت معرفتها بالموضوع.

ولاء:اشمعنى؟

على:علشان ستى ليها حدوته كبيره اوى مع موضوع الزوجة التانية ده كان فيه حد عندهم فى العيله اتجوز على مراته و كان الموضوع ده سبب خراب العيله عندهم علشان كده سبيها تفش غلها فى عمى و أهم حاجه فى الوقت ده تقربى من عمى جامد و تخليه يحس إن انتى اللى باقيه ليه وبتشاركيه فى مشاكله اللى بتحصل بسبب جوازه مره تانيه على مراته النكديه الموضوع ده هيعليكى عنده أوى و يخليه يتمسك بيكى.

شروق:بس أنا عايزاه فى الآخر يطلقنى يا على انا وافقت على الموضوع ده لسببين وانت عارف إن ولا واحد منهم إن أنا حابه الموضوع.

على: متقلقيش كله معمول حسابه أنا اتعلمت مسيبش حاجه للزمن لإنه غدار و ملوش كبير غير اللى خالقنا و احنا مندراش اللى خالقنا مقدر ايه ف خلينا نكيد اكتر من مكيده علشان احتمالية فوزنا تكبر.

شروق:طول ما انت ورايا أنا مش قلقانه و واثقه انك دايما عندك حلول.

نزلت المشاريب و داق كل شخص طعم العصير اللى نزله و بعد سلسلة كلام من اشمعنا ده و ده لأ و ايه اطعم المانجا ولا الافوكادو و الكلام الفاضي ده بدأ الكلام المفيد.

على: كفايه كده بقه و خلينا نشوف هنعمل ايه فى اللى جاى خصوصاً انتى يا شروق لازم تبقى مركزه و مصحصحه لإن التشتيت هيبقى من جهتين كريمه و محمد و طبعاً انتى عارفه كل واحد ايه السبب مش محتاج أقولك.

شروق: أكيد يا على انا مش غبيه للدرجادى.

على:عال أوى ركزوا معايا فى الجاى ده علشان محتاج دماغ فاهمه ايه المطلوب و ايه اللى بتعمل بالذات المطلوب علشان لو عكت فى اللى يتعمل ف تشغلوا دماغكم ، انتى يا شروق هتعملى ……… علشان نوصل فى الاخر ل …….. .

شروق:طب و هنستفيد ايه من الموضوع ده 🤔.

ولاء: يا غبيه افهمى ما انتى لو عملتى كده قدام هتسهلى موضوع الطلاق على نفسك على بيفكر صح عايز يطلعك منها زى الشعره من العجين حقيقى عجبانى دماغك.

على:ولسه لما تسمعى الجايه دى قوليلى يا شروق أنا مين ؟

شروق: أنت على محمود سيد النويري هى دى محتاجه كلام؟

على:لأ أنا الشخص الفاشل اللى قرر أهله يمشوه بعيد عن بيتهم بسبب مشاكله الكتيره اللى كان بيعملها و انتى مش بتطيقينى بسبب إنى كنت شخصيه مغروره فى الجامعه و مش بحب اتكلم مع حد طب عرفتى المعلومات دى أزاى ؟ قدام الناس هتقولى زى ما كريمه هتقول بالظبط و غالباً هتلاقيها بتقول من كلام الشباب اللى كانوا بيقولوه عليا.

شروق:طب طب وليه وجع الراس ده ولازمة ده إيه أصلا؟

على: أنا ابتديت اشك انك غبيه بجد ده اختك ازاى يا ولاء 😂 ، يا اذكى أخواتك كريمه هتكون محاصراكى الفتره الجايه علشان تفهم و تعرف ليه جدى سابك فى الشركه ومطردكيش بعد ما قفشك مع عمى هى فى الأول أكيد هتفكر فى موضوع البوليس و ليه جدى مطلبهمش بس فكرة إن الشركة سمعتها ممكن تبوظ اكتر ما هى بايظه هتخليها تستبعد ده ف هيفضل قصادها ايه بالظبط كده زى ما انتى فكرتى جدى عاقب عمى أنه يعزله من منصبه ك عقاب بس هو يعتبر معاقبكيش ف هتسأل ليه و هتعوز تعرف هل أنا ليا يد فى الموضوع و طبعاً هتعرف ده كده كده ف هتعوز تعرف بعدها ليه أنا اتدخلت؟ هتسألك على ده لما تشوفك كده كده بس انتى طبعاً هتقولى إن مفيش حاجه بينى و بينك و إن جايز أنا مقدرتش على كريمه أنى اوقعها فى حبى ف كنت بحاول معاكى لغاية طبعاً ما اكتشفت انك متجوزه.

شروق:طب معلش خدنى على قد عقلي بس مش هى لما دخلت شافتنا لابسين هدومنا عادى ف ليه تشك إن فيه حاجه أصلا ؟

على: علشان يا اذكى أخواتك لما دخلت كنتوا لابسين أه بس عمى كان واقف ساكت و باين عليه القلق ف لو انتى مثلا سرقتى أو اختك سرقت زى ما قولنا ايه اللى يخلى عمى يسكت بالشكل ده إلا بقه لو هو فى الموضوع و دى هى هتستبعدها فى السرقه لإنها مش منطقيه بالنسبه لها هى أه حقيقه بس هى متعرفش ده فعلطول هييجى فى دماغها إن جدى قفشكم فى المكتب و بما إنها شافتنى معاكم ف كده أنا دافعت عنك خصوصاً إن جدى سالها إن كانت تعرفنى فهمتى حاجه ؟

شروق:بص هى لفه كبيره و هاخد وقت على ما استوعب بس كلامك صح كده كده 🤝 😂.

على:اعملى بس زى ما قولتلك عاملينى وحش إياكى تتعاطفى معايا ممكن تعاملينى ببعض التعاطف فى الاول بس بعد كده ولا اكنى قاتلك قتيل مفهوم ؟

شروق: مفهوم طب و بالنسبه لعمك محمد هعمل ايه ؟

على:عمى هيدور ورى موضوع انك عارفانى ده لإنه أول مره تعدى عليه المعلومه دى و خلى بالك احنا مش هنتقابل غير فى الشركه باعتبارنا زملاء مش اكتر لو فيه شغلانه هنعملها سوى غير كده لا كلام ولا سلام فى التليفون أو فى غيره فعايزك مصحصه مش عايزه يشك فيكى إطلاقاً هو بعد القلم اللى خده هيحب يعوض ويفهم اكتر اللى حواليه.

على:بالنسبه ليكى انتى بقه يا ولاء ف انتى مهمتك بسيطه أوى بس فى نفس الوقت مفيش اصعب منها لإن الغلطه بجول.

ولاء: متقلقش يا ريس هنفذ بإتقان و بعون واحد أحد هنرجع بالكأس 😂.

على: أما نشوف ياختى المهم انتى بما إنك السكرتيره بتاعة رئيس مجلس الادارة ف أكيد أكيد اللى بيساعد عمى فى الشركه هيحاول يوصل للرقم اللى رئيس مجلس الإدارة الجديد هيحطه و علشان ده يحصل فلازم لازم هيحاول يتقرب من الرئيس الجديد دورك انتى بقه تقوليلى لو لاحظتى حاجه جديده بتحصل من أى شخص مع رئيس مجلس الإدارة الجديد حد بيحاول يقرب منه شخص بيدخل و يخرج المكتب كتير بسبب وبدون سبب و ده ليه علشان نحاول نعرف مين الدراع اليمين لعمي محمد لانه اكيد مش هيحاول بنفسه و هيحاول عن طريق دراعه اليمين.

ولاء: كلام منطقي ومفيش فيه مشكله أعتقد أنى اقدر اعمل ده بسهوله.

على: لأ خلى بالك اوعى تستهينى بالموضوع لإنه مش سهل خالص انتى محتاجه تكوني مركزه و مصحصحه و عايزك تبلغيني باللى بيحصل أول بأول.

انتهى النقاش بينهم هنا في اللى يخص الخطه اللى رسمهالهم على و قعد على يهزر شويه و يضحك بعد كده اتحركوا كلهم كل واحد في طريقه.

بعد ما مشيوا دخل واحد قعد على الترابيزه طلب عصير علشان يشربه و فى الوقت اللى كان بيجهز فيه العصير مد أيده تحت الترابيزه و طلع سماعه كانت متركبه فى الترابيزه علشان يقدر وهو بره يسمع اللى بيتقال على الترابيزه.

أتصل الشخص ده بالشخصيه السيكوباتيه و قاله

الشخص: أيوه ياريس حصل اللى كنت متوقعه بالحرف ده لو انت اللى ممليه الكلام مش هيقوله كده لا حقيقى انت ريس ريس يعنى.

السيكوباتى:هو أنا بياع ترمس يلا ده انا دماغى توزن بلد بس أنا اللى اترزقت بيكم دماغ مش بتفكر عارف لو فيكم شوية عقل كان زمانى فى حته تانيه بس نصيبى.

الشخص: ياريس ليه كده بس ده احنا حتى بنجتهد و بنعمل افضل ما عندنا و حتى بنشغل دماغنا بدليل إنك هتطلب مننا دلوقتى نروح نخطف الواد و البنتين دول و نخلص منهم علشان ميعملوش لينا قلق.

السيكوباتى:غبى هتفضل طول عمرك غبى تقدر تقولى ايه اللى يخلينى اخطفه ؟ أولا الواد متخيل إن محمد هو الرأس الكبيره اللى فى الموضوع الغبى مفكره بياخد عرقه من اكتر من شركه و للى يدفع اكتر ميعرفش أن عمه مجرد طابيه على لوح الشطرنج بتاعى لا وقال إيه عايز يراقب مكتب رئيس مجلس الإدارة فاكر الحشره اللى هو حاططها دى هتقدر تعمله حاجه ولا الغبيه التانيه اللى عايزها تشتغل المغفل محمد و تطمنه من ناحيتها لا ومع الوقت عايزه تطلق منه وكمان عايز يشتغل كريمه بنت السيوفى دماغه حلوه و عاجبانى بس بيستخدم ورقه غلط للاسف و علشان كده انا هنسفه بطريقته.

الشخص: ازاى ياريس ده لو سمحتلى اعرف يعنى ؟

السيكوباتى: أقولك ازاى دلوقتى هو بيحاول يشيل العيون اللى على الجندى الكسبان بتاعه واللى هى شروق ما محمد الطبيعي زى ما هو قال هيدور وراها لإن عمرها ما طلبت منه أنه يكيفها فى المكتب بتاعه ف تخيل بقه المره الوحيده أبوه يقفشه لأ ومش بس كده طلعت تعرف ابن اخوه اللى هو حاول يلبسه فى اتجار مخدرات بكيس البودره الكبير اللى حطهوله ده حطله كميه توديه ورى الشمس بس الغريب انه طلع منها و ده شككنى فيه أنه عارف حاجه بس مع الوقت لما حطيناله مايا و حسن و رانيا اللى كانت بقت كارت محروق بس بمساعدة مايا دخلت الجيم تانى و لقيته هو حرفياً اتدلق زى الدغف بقيت شبه متأكد أنها جت معاه حظ ده حتى حاولنا نصوره اكتر من مره الموضوع فشل ابن الكلب حريص و محظوظ بس هيروح فين لف لف و جالى على حجرى بغباؤه أنا بقه هسيبه يعمل اللى يعمله لغاية يوم الحد ساعتها هعمل ……. وبكده نقدر ناخد اللى احنا عايزينه بسهوله عن طريق الراجل بتاعنا اللى موجود فى الشركه عندهم و بكده أكون ضربتهم من كل الجهات هاهاهاهاها.