المتمرد | السلسلة الأولي الجزء الثانى والعشرون

المتمرد | السلسلة الأولي الجزء الثانى والعشرون

عدى اليوم عادى بالنسبه ل على كان مرهق بطبيعة ظروف الشغلانه نفسها لكن كيوم اول كانت الدنيا هاديه مع زمايله حتى كريمه و شروق محدش جه جنبه.

المتمرد | السلسلة الأولي الجزء الثانى والعشرون

خلص على يومه فى الشغل و اتجه لبيته علشان يستريح من تعب اليوم مكنش يعرف إن فيه خازوق مغرى مستنيه تانى يوم الصبح.

تانى يوم الصبح صحى عَلِى عَلَى رنة موبايله و عليها رقم شروق.

على بنعاس:ايه يا بنتى سبينى انام نصايه زياده علشان لما أنزل للشغل.

شروق:الحقنى يا على هيموتونييييييى.

وبكده ينتهى الجزء ده من القصه عارف أنه ممكن يكون قصير وحتى مفيهوش احداث كتير مقارنة بالجزء اللى فات بس الجزء الجاى احداثه كتير و مشوقه اكتر عن الجزء ده اتمنى يكون الجزء عجبكم حابب اشكركم على حسن المتابعه و مستنى رأيكم سلام 👋🏻.

قبل ما انسى حابب أعلن إن الشخص ده @Boruto هو صاحب التوقع الصحيح إن عم على هو اللى بلغ عنه فى موضوع البودره.

🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🚨🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️🎙️

الجزء السايع

ازيكم يا روادى المنتدى لعلكم بخير انتوا و احباءكم من غير مقدمات كتير خلينى اقول أهلا بيكم فى الجزء السابع من متسلسلة المتمرد.

على الجزء اللى فات لما شك فى مايا أخد قرار أدى لتغيير مصير الأحداث تماماً ف بعد ما كان قال لمايا الطريقه اللى هيتبعها علشان يعرف سبب أن عمه بيأذى الشركه و مين اقنع رانيا تحطله بودره فى الشقه قرر أنه يغير أسلوبه خالص بل و كمان أدى خطه وهميه ل شروق و ولاء تخدم الخطه اللى هيمشى عليها.

كان حريص جداً على إن خطته ميعرفهاش غيره على الأقل فى الأول ، طلب على المساعده من شخص ميعرفوش غيره ، على وقت ما خطط كان عامل زى الصياد اللى بيجهز علشان يرمى صنارته و هو بالفعل فى الاخر رماها و فضل مستنى يشوف النتيجه هل هتغمز و تطلع ب سمك ولا هتقوله حظ أوفر المره القادمه.

و جه اليوم اللى المفروض هتظهر فيه نتيجة المناقصه اللى هو عامل الليله دى كلها بسببها.

صحى على اليوم ده و هو عايز ينام تانى لإنه يعتبر منامش من كتر ما هو قلقان لكن قاوم النوم اللى فى عينه و قام أخد دوش ساقع لبس فورمال و اتحرك من بيته متجه للشركه.

على أتحرك من بيته و مع قفله لباب شقته بدأ يفكر و يسأل نفسه يا ترى كنت صح ولا طلعت صياد فاشل و عكيت الدنيا

سيد النويري فى الوقت ده كان موجود على ترابيزة السفره المخصصه للوجبات قدامه الفطار و كوباية شاى بالنعناع من اللى بيحبه و موجود معاه على الترابيزه مراته ريهام اللى كان واضح على وشها الإرهاق بسبب الأحداث الكتير اللى حصلت الايام الأخيره.

عادةً ما كان بيحاول سيد النويري المواساه فعلاقتهم دائماً كانت قايمه على مشاركة الطرفين كل ما يخطر على بالهم مع الطرف الآخر لكن المره دى غير كل مره فمكنش يقدر سيد النويري التدخل و التخفيف عنها ف المره دى الأمر كان متعلق بالوحش اللى دايما بيطاردها.

خلص سيد فطاره و من غير أى كلام أتحرك ناحية جراچ الفيلا علشان يركب عربيته و يتجه ناحية الشركه و كان بيتمنى أن اليوم يعدى على خير فهو بعد الأحداث الاخيره أصبح بيمنى النفس بخبر سعيد يخفف من الأجواء الكئيبه الموجوده حواليه.

وصل الاتنين الشركه فى نفس الوقت تقريباً و اتقابلوا فى مدخل الشركه لكن المره دى غير كل مره المرادى جد على مرماش حتى عليه السلام كانت المعامله جافه بشكل مكنش يتخيل على إن ممكن يشوف جده بيتعامل بيه معاه.

وصل على القسم بتاعه و اول من قابله فى وشه كانت زميلته المتدربه ندى.

ندى: صباح الخير.

على: صباح النور.

ندى:مالك بتقولها من غير نفس كده.

على: مليش يا ندى بس الواحد معرفش ينام امبارح من كتر القلق.

ندى:خير ايه اللى حصل ؟

على:ليا جار بقاله مده تعبان و زاد التعب عليه اليومين دول شويتين و جارى ده يعنى يعتبره زى أخويا. (بيكذب)

ندى: لا ألف سلامه عليه متقلقش لعله خير.

على: ناويه على إيه النهارده ؟

ندى: في إيه ؟

على:مش كنتى بتقولى انك هتكلمى استاذ وجيه علشان تاخدى أجازه كام يوم.

ندى: أسكت أنا متوتره جامد بسبب الموضوع ده لإن أخر مره لما قولتله مرضيش رغم انى كنت هموت و أخد اجازه.

على:إشمعنا ؟ أقولك تعالى نقعد فى غرفة الاجتماعات نرغى و أهو نستنى استاذ وجيه و الاساتذة يحضروا و أكيد طبعاً استاذه كريمه.

دخل على و ندى غرفة الاجتماعات و كان فاضل على ميعاد حضور الكل ١٠ دقائق.

ندى: بص يا على هو مش بيرضى يدينى أجازه لسببين الأول إن لو أنا أخدت أجازه لمدة أسبوع زى ما طلبت ف المده طويله و كده فيه حد من الاساتذه هيبقى مش معاه حد يساعده و التانى إن زى ما أنت عارف إن شروق و أستاذ محمود واخدين أجازه لمده ف أصلا القسم ناقص ده كل ما فى الموضوع ، سيبك من ده و قولى مش المفروض كريمه و شروق دفعتك ؟

على: أه دفعتى و الاتنين معايا في جامعة القاهره.

ندى: أومال ليه بحس لما تيجى سيرتك قصادهم كأن بينك و بينهم ؟

على: أنا أقولك أصل أنا فى الجامعه مليش أصحاب كتير و دائماً كان يتقال عليا تنك و مش بحب اتكلم مع الناس علشان كده هتلاقيهم مش بيحبوا يسمعوا سيرتى بيخافوا منى اصلهم منافسين معايا ع ترتيب الدفعه 😅.

ندى:أهاااا ممكن برضه بس بصراحه يعنى انت من الشويه اللى اشتغلنا فيهم سوى انت لا يمكن تكون تنك أو مغرور فى الأول كنت خايفه نشتغل على حاجه سوى كنت خايفه يكون عندك جنون عظمه زى كريمه أو تكون لعبى و مش بتهتم بالشغل زى شروق ما بتعمل من يوم نزولها التدريب هنا 😅 ، لكن انت طلعت مختلف عنهم بصراحه الاساتذه مرتاحه فى الشغل معاك ده غير أنا نفسى فى أول يوم شغل بينا ارتحت فى الشغل معاك عن الباقى و معاملتك كويسه مع الناس ف أكيد هما اللى فيهم حاجه غلط 😂.

على:تسلمى يا ندى على الكلام الجميل ده، بقولك متعرفيش نتيجة المناقصه اللى دخلتها الشركه اللى تبع …… .

ندى: بصراحه لأ و عندى فضول أعرف النتيجه أنا كمان بس المشكله إن مش هقدر اعرفها.

على:أمممم بقولك ايه ولاء السكرتيره بتاعة مكتب رئيس مجلس الاداره اللى فى الدور اللى فوق هيعدى عليها الملف اللى فيه النتيجه لو تقدرى أطلعى و حاولى تعرفى منها النتيجه.

ندى: تفتكر هترضى تقولى ؟

على: أنتى علاقتك كويسه معاها يا ندى فمظنش أنها هترفض و يا ستى لو مرضيتش ساعتها انا هتصرف و اعرف النتيجه و أقولك بس أنا واثق إنها هتقولك.

ندى:طيب هستنى ساعه أو اتنين وأطلع اسألها.

على:بس غريبه انك مهتمه بالمناقصه يعنى ؟

ندى: يا على ده الشركه كلها مورهاش غير الموضوع بسبب حالة الشركه اللى واضح للكل أنه بيقع.

على: للأسف أه الشركه حالها فى النازل بس واثق إن لو كسبنا المشروع اللى عليه المناقصه دى ساعتها الشركه هتبدأ تستعيد التوازن تانى.

ندى: ده أكيد.

بعد دقائق من الكلام بين الاتنين دخلت عليهم كريمه و بعدها بدقائق الاستاذه المحامين و الاستاذ وجيه و كان غايب عن الحضور ٢ محمود ابن عم على و شروق مرات أبو محمود.

بدأ الاجتماع و بدأ الاستاذ وجيه يستعرض الشغل الموجود الاسبوع ده ف بدأ يتكلم عن العقود المحتاجه لترجمه علشان مع شركاء أجانب و أتكلم عن الدعاوى المرفوعه على الشركه و بدأ يقسم الشغل على الموجودين كالاتى

وجيه:ندى هتكوني الاسبوع ده موجوده مع أستاذه هدى انتو الاتنين هتشتغلوا على الدعاوى المرفوعة من ……. و من ……… كلها دعاوى تعويض عن المبانى اللى سقطت فى منطقة…… .

ندى:بس يا استاذ لو تسمحلى كنت عايزه أخد الاسبوع ده أجازه.

وجيه: إيه السبب ؟ بعدين القسم حالياً محتاج كل واحد ولا انتى ايه رأيك.

ندى: معاك حق يا استاذ بس حقيقى أنا محتاجه الاجازه دى عقبال أولاد حضرتك أنا فرح اختى أخر الاسبوع و حضرتك عارف إن احم يعنى بيبقى فيه تجهيزات كتير و حابه اكون مع اختي.

الكل:ألف مبروك يا ندى عقبالك انتى كمان.

وجيه: مبروك يا ندى بس برضه احنا محتاجين كل فرد فى القسم للأسف شروق اجازتها لسه مكمله شويه.

هدى:لو تسمحلى يا استاذ وجيه أنا ممكن أشتغل فى الدعاوى لوحدى من غير مساعده او ممكن لو مش هضايق حد من الاساتذه طبعاً نقسم الوقت مع الشخص اللى معاه ممكن اخد جزء من الوقت كريمه او على.

ابتسام و رامى: معندناش مشكله ده أكيد.

وجيه: وأنت يا على انت و كريمه حد عنده مشكله ؟

على:لا معنديش مشكله الواحد لازم يساعد الزملاء برضه يا ريس.

كريمه: بصراحه يا استاذ أنا الأسبوع ده مضغوطه ف مش هقدر أشيل مكان ندى اعذريني يا ندى.

ندى بضيقه:ولا يهمك يا كريمه.

على:ممكن أنا يا ريس بعد إذن حضرتك و الاساتذه أكيد أشيل أنا مكانها ندى ساعدتنى كتير فى الشغل و جه الوقت أن اساعدها أنا.

كريمه بصت ل على بصه هو مقدرش يفسرها هل دى غيره ولا ضيقه من أنه بيساعد غيرها ولا ايه بالظبط لكن بعد نظره عنه و بيبص ناحية ندى لقاها بصاله وهى عنيها بتشكره على وقفته جنبها و أنه هيعمل مجهود مضاعف علشان تحضر تجهيزات فرح أختها.

وجيه:حد عنده اعتراض يا استاذه ؟

محدش رد كإعلان لعدم الإعتراض ف قال أستاذ وجيه حيث كده بقى خدوا التقسيمه دى.

وجيه:كريمه هتكوني مع أستاذ رامى الاسبوع ده هتشتغلوا على الدعاوى التعويضيه اللى تخص منطقة…….. المنطقه دى الدعاوى بتاعتها عامله قلق عايز فيها نتايج مبهره املى فيكم كبير.

وجيه: أنت يا على هتكون موجود مع أستاذه هدى و أستاذه ابتسام طبعاً انتوا عرفتوا أستاذه هدى ايه يخصها بالنسبه لأستاذه ابتسام فهى معاها دعاوى منطقة……. و عقود شركة……. الإيطالية العقد ده مهم جداً جداً للشركه مطلوب أنكم تترجموا العقود و طبعاً عايزها مظبوطه بشكل يكون فى صالحنا او على الاقل ميضرناض هتكونوا مع أستاذ نادر من قسم الماليه للتفاوض على العقد تمام ؟

على:تمام يا ريس هنرفع رأسك و نشرفك.

انتهى الإجتماع و أتحرك الأساتذه و المتدربين على مكاتبهم و أتحرك على اتجاه أوضة الاساتذه المحامين اللى المفروض هيكون شغله الفتره الجايه أغلبه فيها بعد ما أخد أستاذ رامى أوضة المتدربين الأسبوع ده علشان يسهل التعامل و التواصل ما بين على و هدى و ابتسام و كل ده طبعاً بالتنسيق مع هدى و ابتسام.

دخل على لقى ابتسام و هدى على مكاتبهم فى الاوضه و مفيش غير مكتب واحد فاضي دخل قعد على الكرسي و بدأ الكلام و التنسيق ما بينهم أزاى هيتم التعامل مع على طول الاسبوع.

تم الإتفاق على هيكون مع هدى يوم السبت و الاتنين و التلات و ابتسام يوم الاحد و الأربع و الخميس.

تم الإتفاق و بدأ على شغله مع هدى و بدأ يقرأ الاوراق و يعرف أخر مستجدات الدعاوى اللى المفروض هيشتغل فيها و يبدأ يفهم إيه المطلوب.

سيد النويري اول ما وصل مكتبه فى الشركه دخلت عليه ولاء و رمت عليه تحية الصباح.

ولاء: صباح الخير يا استاذ سيد.

سيد: صباح النور يا ولاء ، بلغى استاذ نادر رئيس قسم الماليه عندنا إن يكون فى مكتبى خلال نص ساعه بالكتير.

ولاء: تمام يا فندم حضرتك تؤمر بحاجه تانيه ؟

سيد:ابعتيلى كوباية شاى بالنعناع على مكتبى.

ولاء: تمام يا فندم.

خرجت ولاء من المكتب و سابت سيد النويري لوحده فى المكتب سرحان فى الصوره الموجوده على مكتبه.

سيد كان حاطط صوره بتجمع بين أفراد عيلته صوره قديمه شويه لكنها بالنسبه ليه غاليه اوى على قلبه.