المتمرد | السلسلة الأولي الجزء الرابع والثلاثون

المتمرد | السلسلة الأولي الجزء الرابع والثلاثون

مكذبش عليك أنا مختار التى شيرت ده لمعنى الكلام المزدوج 😅 حبيت أخلى محمود يشك بجد أن أنا برمى بكلامى عليه و ده علشان يدب خناقه معايا و هتعرفوا ليه بس خلينا نروح لمكان العشاء الواحد جاع تعالى كل معايا أنت مش غريب.

المتمرد | السلسلة الأولي الجزء الرابع والثلاثون

" بعد العشاء "

قعدنا بعد العشاء قدام التلفزيون و محمود ابن عمى أنا ملاحظ أنه مركز معايا و نظراته مش طبيعيه أبداً لكن بصراحة فاجئنى بثباته الانفعالى ده حتى مسألنيش عن سر لبسى للتي شيرت فخلاني مضطر ازود العيار حبتين علشان أجره للى أنا عايزه و مستنتش كتير لغاية ما الفرصه جاتلى لوحدها.

ميار (عمتى) : شايفين البطله اللى فى الفيلم شكلها حلو ازاى.

شمس:مش حلوه اوى يعنى .

ملك:يا شيخه حرام عليكى بقه دى مش حلوه طب اقنعينى أزاى ؟ أنتى بس علشان مش بتحبيها.

شمس: طب احضرنا أنت يا على و قولنا حلوه ولا مش حلوه.

أنا: متأكده انك عايزه تعرفى رأيى ؟

شمس: أكيد.

أنا: مش فارقه هي جميلة ولا لأ أساساً هى مش بتمثل فى أفلام رومانسي لكن لو بتتكلموا على شكلها بشكل عام بعيدا عن الفيلم ف بصراحه شكلها حلو لكن الأهم أنها تكون جميله من جوه زى من بره متاخدش واحده من مراته مثلاً ولا تفسخ خطوبتها علشان تروح تضحك على قريب خطيبها الغنى في النهايه مع مرور العمر الروح هى اللى باقيه و الشكل بيروح

شمس: إيه ياعم الاجابه الطويله أوى دى أنا سألت سؤال من ٣ كلمات أنت رديت ب ٣ سطور 😂 شكلك مفهمتش سؤالي كويس.

أنا: بالعكس فهمته و جاوبتك بأفضل شكل و اديتك نظرتى للست بشكل عام شكلها عامل أزاى ولا أنت رأيك إيه يا حوده مش لو واحده فسخت خطوبتها و راحت خطبت قريب خطيبها علشان غنى حتى لو حلوه من بره تبقى وحشه من جوه و متستاهلش إن يتبصلها ؟

محمود: اكيد ، بقولك يا على جامد التى شيرت اللى عليك ده اول مره أشوفه عليك.

أنا: أه ما أنا لسه شاريه قريب ، بصراحه بحب الجمله المكتوبه عليه دى أوى معناها جميل و معبر عن هدفى.

محمود:اللى هو إثبات إنك صح فى كل حاجه مثلاً.

أنا: أنا قولت كده ؟ أنا هدفى أن أكون شخص ناجح و ذو شأن كبير مش بس فى العيله هنا لأ أنا هدفى أكبر من كده بكتير و علشان أحقق هدفى لازم أصبر لأن طول ما أنا فى الطريق هتقابلنى عواقب زى العاصفه اللى لو صبرت عليها هلاقى السماء الذهبيه بتاعتى واللى هى هدفى اللى اتحقق.

محمود:بس أنا مظنش إن ده سبب لبسك التيشيرت ده أصلا و أظن كمان أن عمى هيوافقنى في رأيى مش كده يا عمى ؟

أبويا:كلام على الصحيح يا محمود هو هيستفيد إيه من لبسه للتى شيرت يعنى ؟

محمود: أنت مسمعتهوش يا عمي وهو بيتكلم على كان بيلقح بالكلام على نور و على كريمه ده غير التى شيرت بتاعه و الكلام اللى مكتوب عليه.

أنا:مش مستوعب أن أبويا نصر رأيى على رأيك 😂 معاك حق الصراحه أنا كمان مش مستوعب لأول مره أبويا يقول إن أنا صح و هو معاه حق بصراحه أنت بقه بيتهيالك حاجات كتير الايام دى.

محمود: تقصد أن أنا مجنون 😡.

أنا: خليك هادى يا حوده أنت متعصب ليه بس أهدى لا يطق لك عرق قولتلك.

محمود: بقولك ايه بلاش الجمله اللى بتعصبنى دى.

ريهام (جدتى) :جرى إيه يا واد هو كلمك ولا جه جنبك ما تشوف إبنك يا محمد اللى بوظلنا القعده ده.

محمد: أقعد يا محمود و بلاش حركات ******* اللى بتعملها دى اقعد خلينا قاعدين هاديين.

محمود: بقيتوا كلكم عليا دلوقتى خلاص بقه هو اللى على الحجر علشان رضاكم.

أنا:ياعم أنا جيت جنبك ولا كلمتك أنت عاملك غاغه ليه على المسا أهدى بقه خلينا نكمل الفيلم.

محمود بزعيق: بقولك ايه اهمد أنت و ملكش دعوه بيا أنا حر اعمل اللي عايزه.

جدى بصوت قوى: مش عايز كلمه تانيه من حد فى اللى قاعدين الكل يسكت و أنت يا محمود أهدى بدل ما أقل منك قدام اللى قاعدين أنت فاهم.

محمود:بس يا جدى …… جدى: محمود حصلنى أنت و عَلِى على مكتبى جوه و مش عايز حد يقاطعنا مهما كان مين.

" فى المكتب "

جدى:تقدرو تفهموني ايه اللى حصل بره ده ؟

أنا: محصلش حاجه يا جدى زى ما أنت شفت أنا معملتش حاجه مش عارف ليه محمود مقلق منى مع أن كلامى عادى.

محمود: ولااااااااا مش هتعملهم عليا أنا وأنت عارفين كويس إن أنت تقصد اللى فى دماغى و إن كنت فاكرنى اقتنعت باللي حصل يوم ما جيت تصالحنا تبقى غلطان ، لا أنا ولا شمس مقتنعين و عارفين إنك بتحاول تطلعنا احنا اللي غلطانين متغيرتش من يوم الشاليه خبيث زى ما أنت ، عايز تبقى إنت بس الصح.

أنا: أنا عملت كل ده !!! إيه اللفه دى كلها يبنى 😂 بعدين أنا لو فعلا عايز أثبت أنى صح إيه هيخلينى أجى اصالحكم ده أنا كده جاى على نفسى و بثبت للكل أن أنا اللى كنت غلط أنت مش مستوعب أنت بتقول ايه بعدين أتكلم عن نفسك شمس ما هى بتتكلم معايا عادى و بتهزر أنت اللى مش عارف مش راضي تصفى ليه.

محمود:مش هصفالك علشان أنت مش سالك خبيث و هتفضل طول عمرك خبيث.

أنا: أتكلم أنت يا جدي انا خلاص جبت أخرى منه أى حاجه بحاول أعملها مش عاجبه يعنى اصالح مش عاجب أزعل مش عاجب قولى أنت إيه المطلوب منى.

جدي:شوفوا بقه شغل العيال الصغيره اللى شوفته ده مش عاجبنى جرى إيه هو عشان سايبينكم على راحتكم هتخيبوا بلاش شغل العيال ده و أنت يا محمود يا زفت إيه اللى انت بتقوله ده أنت واعي للكلام اللى بتقوله متخليش عصبيتك تعميك.

محمود:يا جدى أنا فعلاً مش بختلق كلام من دماغى تقدر تسأل شمس هتلاقيها بتقولك نفس الكلام اللى بقوله.

جدى:ولو طلعت بتألف اى كلام يا محمود ؟

محمود:ساعتها اللى هتقول عليه هنفذه يا جدى.

جدى: إيه رأيك يا على في الكلام ؟

على:اللى تشوفه يا جدى مادام ده هيريحك و يريحه ف أنا معنديش أي مشكلة.

" بره المكتب "

ملك: عاجبك كده يا شمس أديكى خلقتى مشكله من مفيش مبسوطه ؟

شمس: وأنا مالى هو أنا اللى قولتلهم يزعقوا مع بعض.

ميار (عمتى): بقولكم ايه اتلموا احسن لكم هتتخانقوا أنتوا كمان ولا ايه مش كفايه اللى جوه ما تقوليلهم حاجه يا ماما.

ريهام: أنا لو اتكلمت هقول كلام يزعلكم كلكم ف الأحسن أفضل ساكته.

ميار:طب تفتكرى بابا بيعمل إيه معاهم جوه ؟

ريهام:عمال يحب فيهم.

ميار:نعم!!

ريهام:نعم … عليكى يا عنيا ، انتى بتسألى سؤال إجابته مش محتاجه خبير اتنين بيتخانقوا و واحد اخدهم علشان يبقوا لوحدهم هيبقى عايزهم ليه ؟ اعقلي أسئلتك انتي الثانيه متعصبينيش اكتر ما انا متعصبه.

قامت خالتى من المكان بعد جملة جدتى ريهام ومفيش ثوانى و الكل بص ناحية باب مكتب جدى اللى اتفتح و خرج محمود منه.

ريهام:خير يا زفت حصل إيه جوه عملتوا إيه ؟

محمود:جدى عايز شمس معانا جوه.

الكل بص لبعضه و بعدين ألتفت و ركز مع محمود.

ريهام:مقالش عايزها ليه طيب ؟

ملك: إيه اللى جرى يخليه عايزك جوه يا شمس ؟

شمس:وحياتك معرفش ما انا قاعده زيى زيك اهو.

محمود: يلا انجزى يا شمس مش عايزين نتأخر.

" داخل المكتب "

جدى طلب من محمود يخرج يطلب من شمس تدخل خرج محمود وجدى بقه قاعد مركز معايا

أنا:خير يا جدى أنت أول مره تشوفني ولا ايه 😂.

جدى:مش قولتلك أن أنت مسيبتش الموضوع.

أنا:و أنا لسه عند كلامى أنا فعلاً مش مهتم بالموضوع ده حالياً أنا خلاص اكتفيت أنى أعمل مشاكل مع حد أنا عايز أعيش مسالم.

جدى: شوف أنا عارف إن مش هقدر أخد معاك حق ولا باطل لإن مفيش دليل ملموس إنك حاططهم فى دماغك بس هقولك حاجه واحده بلاش تعمل حاجه تفشكل العيله تانى يا على أديك شايف جدتك مبسوطه أزاى اليومين دول متبهدلوناش في آخر عمرنا يابنى.

أنا: أنت شايف أن أنا ممكن أعمل ده يا جدى ؟ بقه بعد كل اللى اتكلمناه و بدأنا ننفذه أنت شايف أن ممكن اؤذى العيله بص يا جدى هجيبهالك على بلاطه أنا مش هكون مؤذى للعيله بأى شكل من الأشكال لأن أنا نفسى اتاذيت جامد و مش هقبل أن حد يشوف اللى شوفته ف متقلقش أنا أصلا مش مكمل هنا كتير.

جدى: تقصد إيه بالكلام ده ؟

أنا: بعدين هشرحلك يا جدى علشان ده موضوع يطول شرحه المهم دلوقتى خلينا نشوف موضوع محمود اللى أتأخر بره ده

مفيش ثواني و دخل محمود و معاه شمس و بدأنا الجولة الثانية مع محمود.

جدى: تعالى يا شمس متخافيش تعالى أقعدى هنا .

( شاور على كرسي موجود)

جدى: دلوقتى محمود بيقول ان انتى وهو مصفيتوش من ناحية على صحيح الكلام ده ؟